ཕྱི་ལོ་ ༢༠༢༤ ཟླ་ ༩ ཚེས ༡༨ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་རྒྱལ་བའི་དབང་པོ་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་བསྟན་འགྲོ་སྤྱི་དང་བྱེ་བྲག་བོད་གངས་ཅན་པ་ཡོངས་ཀྱི་མགོན་དཔུང་དམ་པར་སྐུ་ཚེ་༸ཞབས་པད་བསྐལ་བརྒྱར་བརྟན་ཅིང་། ཐུགས་ཀྱི་བཞེད་དགོངས་ཟབ་མོ་རྣམས་ལྷུན་གྱིས་འགྲུབ་པའི་ཕྱིར་ཇི་ལྟར་གསོལ་བ་བཏབ་པ་ལྟར་༸གོང་ས་ལྔ་པ་ཆེན་པོའི་དག་སྣང་ཚེ་དཔག་མེད་དྭངས་མ་བཅུད་འདྲེན་གྱི་སྒོ་བརྟན་བཞུགས་བསྟར་འབུལ་ཞུས་ཡོད་པ་པ་དང་།
དེ་ཉིན་སྔ་དྲོ་ཕྱག་ཚོད་༨ དང་སྐར་མ་ ༢༠ ཐོག་༸གོང་ས་༸སྐྱབས་མགོན་ཆེན་པོ་མཆོག་ཐེག་ཆེན་ཆོས་གླིང་གཙུག་ལག་ཁང་དུ་མི་མང་སྟོང་ཕྲག་མང་པོས་རང་ལུགས་ན་བཟའི་རྒྱན་གོས་སྤྲས་ཤིང་། གཡས་གཡོན་བསང་དུད་དང་བདུག་སྤོས་ཀྱི་ཕེབས་བསུ་ལེགས་པར་བསྐྱངས་ཐོག་༸གོང་ས་མཆོག་བཞུགས་ཁྲིར་བདེ་བར་འཁོད་མཚམས་བརྟན་བཞུགས་ཀྱི་དབུ་བཞུགས་ཟམ་གདོང་རིན་པོ་ཆེ་མཆོག་ནས་མཇལ་དར་རྐྱང་འབུལ་དང་། བརྟན་བཞུགས་ཆོ་ག་ནས་མཁའ་འགྲོ་བསུན་བཟློག་གསུང་མུར་གསོལ་ཇ་འབྲས་སིལ་རིམ་པར་ཕེབས་པ་དང་། བརྟན་བཞུགས་དངོས་གཞི་བླ་མ་ལྷར་བསྐྱེད་ནས།
ཚོམ་བུ་འདེགས་འབུལ་དང་། བཀྲ་ཤིས་རྟགས་བརྒྱད། རྒྱལ་སྲིད་སྣ་བདུན། བཀྲ་ཤིས་རྫས་བརྒྱད་སོགས་རིམ་ཕུལ་གྱིས་བརྟན་བཞུགས་དབུ་བཞུགས་དང་། བོད་ཀྱི་ཟློས་གར་ཚོགས་པའི་ན་གཞོན་ཕོ་མོ་ཁག་གཅིག་གིས་སྐུ་ཚེ་བརྟན་པའི་གཞས་སྣ་གཟིགས་འབུལ་ཞུས་ཡོད།
དེ་ཉིན་ཕྱི་དྲོ་ཆུ་ཚོད་ ༣ ནས་དགོང་དྲོ་ཆུ་ཚོད་ ༧ བར་ཕྱོགས་མཐའ་ཁག་ནས་བརྟན་བཞུགས་བསྟར་འབུལ་ཆེད་ཕེབས་གནང་བའི་མལ་གྲོ་གུང་དཀར་རྫོང་གི་སྐུ་མགྲོན་དང་མི་མང་རྣམས་ལ་རྡ་ས་མལ་གྲོ་གུང་དཀར་སྐྱིད་སྡུག་ཚོགས་ཆུང་གི་གོ་སྒྲིག་འོག་རྡ་སར་རྟེན་གཞི་བྱས་པའི་ཤིང་མཁར་མགྲོན་ཁང་དུ་སྐུ་མགྲོན་དང་མི་མང་རྣམ་པར་དགོང་དྲོའི་ཞལ་ལག་ཞིག་འདེགས་འབུལ་གནང་བ་དང་འབྲེལ། དེ་ཉིན་གནས་ཡོད་ཀྱི་མི་སྣ་སྤྱི་འཐུས་བསྟན་འཛིན་ཆོས་འཛིན་དང་། རྣམ་གྲྭ་དགེ་བཤེས་བློ་བཟང་གྲགས་བཅས་སྐུ་མགྲོན་གྱི་གཙོ་བོར་མགྲོན་འབོད་དང་འབྲེལ་སྐུ་མགྲོན་རྣམ་པ་ཚོར་ཐུགས་རྗེ་ཆེ་ཞུའི་མཇལ་དར་སྒྲོན་པ་དང་། མཐར་སྐུ་མགྲོན་གཙོ་བོ་དགེ་བཤེས་བློ་བཟང་གྲགས་པ་མཆོག་ནས་ཚོགས་པའི་ལས་དོན་བྱེད་ཕྱོགས་དང་འབྲེལ་བའི་ཐད་མི་མང་རྣམ་པར་བཀའ་སློབ་ཟབ་མོ་ཕེབས་ཡོད། མཐར་དགོང་དྲོ་ཕྱག་ཚོད་བརྒྱད་དང་ཕྱེད་ཀ་ཙམ་ལ་མི་མང་རྣམ་པ་མཉམ་འདུས་ཀྱི་སྐུ་དཔར་ཞིག་བསྒྲོན་ནས་འདུ་འཛོམས་དེ་བཞིན་དོན་སྙིང་ལྡན་པའི་ངང་མཇུག་སྒྲིལ་བྱུང་བ་བཅས།